孤城巴萊爾與東之珀露

詳細資訊

！注意：此書由粵語寫成！

本書作者貓眼蝕因暴動罪、襲警連同其他罪名於2020年年中至2023年年末間被困於牢獄，所有原稿皆於赤柱監獄中撰寫。
本書所描述嘅所有故事均發生於奈亞大陸，與現時地球上嘅一切無關。

＊＊＊＊＊＊＊＊＊＊

六篇發生於另一片大陸上嘅故事，榮耀與卑微、迷失與復得、愚樂與自由傷痛之間嘅故事遙遠又似乎曾經歷歷在目。

〈薯仔〉
法娜畀爺爺叫去買薯仔，但係賣薯仔嘅肥婆就同佢講呢啲叫土豆。
巴萊爾人失去自己嘅家園數千年，屈居喺自己城市當中嘅貧民窟。佢哋嘅傳統被禁止、歷史被清洗、佢哋嘅神受到污衊，但係佢哋依然冇忘記自己嘅身份。一個成年巴萊爾人先知道嘅秘密，喺極權統治底下，一種扭曲，但係為咗保存自我嘅極端方式。

〈異端〉
施達親眼睇住自己老婆畀一班又肥又醜嘅老修女拖入密室。
霍莉隔住鐵門傳出嚟嘅慘叫聲雖然聽落好似喺好遠嘅地方傳過嚟，但仍然聽得出佢係出盡力咁嗌，個種聲音就好似被囚禁一樣只允許喺密室當中迴蕩。門罅閃過火光同埋沉重嘅金屬撞擊聲，施達憑呢樣就知道霍莉喺裡面搏命掙扎。

施達想拖住呢一副有如過熟香腸一樣皮開肉裂嘅身軀衝過去拯救自己嘅老婆，奈何佢根本連喺地上面躝都躝唔到。
當霍莉畀班老修女拖返出時，施達淨係見到佢雙腿內側有血液沿住大髀上幾條血痕一直流到腳踭。佢倒卧喺施達身邊，身體散發住一陣燒肉燶味。

「我….已經唔再係女人。」

而佢哋個仔——貝果仔就着住一件純潔無瑕嘅金邊白袍，坐喺紅衣主教杜基嘅大髀上面，沉默咁做煉獄嘅見證人。

〈奴隸與牛〉
農場有個好奇怪嘅老農奴，日日唔做嘢，淨係同隻白牛傾計。其他農奴拎佢嚟做笑話，每日拎啲爛豆畀佢同隻牛食，聽佢老作自己同隻牛各自嘅風流往事。但係，啱啱歸化成為奴隸幾年嘅艾歷喺一個個聽似荒唐嘅故事之間搵到一絲可信嘅理由，得佢聽得出嗰隻名叫「亞歷山大。卡林梅洛。阿爾馮斯。富蘭克林」嘅白牛曾經擁有、而農奴連諗都未諗過有嘅珍寶。

〈老人與豬〉
伐木老人個仔因為參加幾年前嗰場唔講得嘅事件而受到軍隊嘅追捕，最終流亡異鄉後音訊全無。老人每日出門或者返到屋企都會打開信箱，期盼收到一封嚟自遠方嘅信，但每次都只有失望。
野豬突然成群由深山去到村莊搵食，情況嚴重到特別行政省政府出動軍隊掃蕩。老人年輕嘅時候上山斬柴經常遇到野豬，知道佢哋唔會無緣無故接近人嘅地方。一個個仔失蹤嘅老人家、三把老舊嘅斧頭，連自己都唔知點解想阻止村民同軍隊屠殺野豬。

〈歸國〉
四個落敗嘅角鬥士踏上返返自己家園嘅旅程。兩個嚟自泱泱大國，兩個嚟自細小嘅行省，而民眾就為佢哋準備好麻繩同高台。

〈狼山〉
凱莉自經歷幾年前嗰件唔講得嘅事件之後徹底迷失，佢嘅朋友戰死嘅戰死，放逐嘅放逐，淨低嘅各自忙各自嘅人生，做依然可以做嘅事。但係淨係得凱莉唔知自己想做乜，唔知自己可以做乜，覺得人生好似冇乜意義。迷茫間，佢收到一個痴線朋友嘅邀請，去征服一座充滿怪異生物嘅山。
佢發現，喺一片全新嘅環境，原來迷失係再自然不過嘅事。

媒體推薦

ReNews採訪

《孤城巴萊爾與東之珀露》，全長約八萬字，一部由六個短篇故事集結而成的奇幻故事集，作者筆名「貓眼蝕」，3月中在電子書平台上架。
沒聽過？當然。這本書發表至今，買過的人只有二十多個，「係慘烈嘅，買嘅都係自己朋友。」貓眼蝕笑著說。事實上，還有不少人看過《孤城巴萊爾》，但這些人看的是原稿，他們大都仍然身處赤柱監獄，因為《孤城巴萊爾》，是貓眼蝕因為暴動在赤柱服刑期間用筆手寫的故事，再用信紙寄出來，由朋友結集在網上發表，「加加埋埋 40 幾封信，我通常都係一次寫滿四張紙。」
「赤柱還押係單人房，夜晚就會好多時間，一個人寫嘢、一個人諗嘢，寫作嚟講，係一個好好嘅環境，哈哈哈。」
＊＊＊
貓眼蝕自己的故事，和這幾年很多人的類似，那年夏天他因為暴動罪被捕，21年初認罪還押，去年年底出獄，重投社會之後找了份工作以外，這幾個月他專注於將自己在赤柱寫的《孤城巴萊爾》結集成書。
「叫做終於講晒，我想要講嘅嘢。」貓眼蝕如此形容。那這本書，要講的是甚麼？
貓眼蝕說，當初給他創作動力的，是東京奧運香港女子重劍隊，正在獄的他在電視鏡頭看到她們在八強止步後的眼淚，「佢哋喺鏡頭面前喊晒，又要同香港市民講話對唔住，佢哋無欠過任何人，點解要講對唔住呢。」
「每一句對唔住、每一滴眼淚都引發咗我心入面嘅愧疚，到底香港人做過咩先值得有呢班充滿榮譽心嘅運動員為香港人而戰？」這種情緒牽引他寫了第一個完整的短篇《歸國》「就係講競技場嘅鬥士」。
之後他陸續完成了其他短篇，貓眼蝕笑說，獄中想寫點東西的人很多，但真的能「寫完」的並不多，他在赤柱的筆耕持續了大概一年半，最後寫完了書中第一個短篇故事《薯仔》，「頭兩個故仔係最尾寫嘅，成本野係調轉寫嘅。」
《薯仔》發生的故事背景，就是書名中的巴萊爾，巴萊爾人在山嶺建立了自己的城邦，長久以來在東西兩大勢力之間遊走，「因其自身獨特性無法融入任何一方」，直到十八年前，由東方極權進攻「迅速淪陷」，巴萊爾人被殖民統治者稱呼為「仆街巴萊爾雜種狗」。
但即使淪為賤民，巴萊爾人仍然在地下保存他們的信仰－曾經帶領他們對抗殖民統治的戰士，只要向煙火祈願，女神會降下魔法的火種，將敵人和作為犧牲品的祈願者一同燒成灰燼，書中的巴萊爾人曾在召喚女神前高呼，「巴萊爾人，報仇。」
「我個諗法係，好多嘢現實中唔講得，尤其是而家，但如果我將佢，放咗喺一個唔存在嘅世界呢？」
貓眼蝕提到，已故的李怡先生曾多次寫過的一段：
「歷史，除了人名和年代是真的之外，其他都是假的；小說，除了人名和年代是假的之外，其他都是真的。」這段原句出自蘇格蘭諷刺作家和歷史學家卡萊爾。
「呢個方向，令我開始諗寫小說呢回事。」貓眼蝕說。
＊＊＊
那《孤城巴萊爾》作為一本短篇小說集，水準如何？「其實做到成本嘢出嚟已經好滿意，水準上我都滿意嘅。」
「雖然我覺得呢本未夠好。」
作為讀者， 《孤城巴萊爾》設想奇幻、感情豐富，但未算流暢，閱讀時頗花心神，因為整本書都是以廣東話書寫，「有呀有呀，係棘棘地。」
「好多時用粵語，係會將啲嘢前後調轉晒，因為我哋講野係咁，但係如果你寫咗落嚟，會好怪。」貓眼蝕說，在寫作過程中，他一直在用書面語和用廣東話來寫作中拉扯，不少故事他分別寫了廣東話和書面語兩個版本，我俾我入面啲朋友睇，佢哋都話用書面語好睇好多，通順好多。」
但最終，他仍然決定要用廣東話來寫這本書，「最終都係，想出一本我哋語言嘅書」，貓眼蝕說，以往廣當話一直予人一種不夠「正式」的感覺，連他自己在書寫時都經常有這種掙扎，「但我成日會諗，你諗嘢都係用廣東話，點解會覺得廣東話唔正式？」
「我想大家都改，改變睇廣東話嘅方式。」
貓眼蝕明言，這本書不會大賣，目前只有電子版，未來就算印實體版，都不是打算用以發售，「我入面有朋友幫我睇，我係想俾返本完完整整嘅佢哋，而入面係無電子版。」在他創作和結集過程中，有不少朋友協助過，他亦希望送對方一本實體版，「唔知點解﹐硬係覺得書就應該揸上手。」
寫作本身、故事的情節、以至廣東話的書寫，這一切一切，都是貓眼蝕對自己的一個交代，「一生人如果有一本書，係自己個名義出，對我嚟講好重要，其實好似一種延續。」 有人選擇買樓、有人會結婚生仔，貓眼蝕在經歷完近三年的牢獄之後，選擇 以這本書將他的想法、思念延續，這有點像住在弧城巴萊爾的人，將信仰寫成傳說，希望可以流存下去。
「到我真係唔係度啦，呢樣嘢可以作為我存在過嘅證明。」
後記
想當然矣，但為判過刑坐過監的一員，自必然有很多人認為，貓眼蝕應該離開香港，貓眼蝕說，還押之前他的確有想過，「無啦而家就。」
一方面，他已經服刑完畢，理論上身家清白可以重新開始，還有一個更重要的因素，促使貓眼蝕留在香港，「因為我想繼續寫嘢。」
「我想寫我哋自己語言，如果我離開咗，我無可能寫得返呢度嘅故事，我會咁諗。」
但風險問題貓眼蝕亦有考慮過，「如果唔係我真名出書啦」，作品亦只是在電子書平台上架，「睇情況啦，如果有日連一啲虛幻嘅故仔，都接受唔到嘅話，我會諗離開。」
「而家呢一刻你覺得仲可以？」
「可以嘅。」貓眼蝕說。

https://www.facebook.com/renewshk/posts/pfbid02NZgRWRWQU42PU9JhWbepi763gMPubtPsCQfq3zDuEHrqQBAghyQqQzyzuLq16Dw3l

目錄列表